МОЛИТВА ПОКАЯННАЯ,
ЧИТАЕМАЯ В ДЕНЬ УБИЕНИЯ ЦАРСКОЙ СЕМЬИ 4/17 ИЮЛЯ

Благословен еси Господи Боже Отец наших, и хвально и прославлено имя Твое во веки, яко праведен еси о всех, яже сотворил еси нам, и вся дела Твоя истинна и правы путие Твои, и вси Суды Твои истинни, и судьбы истинни сотворил еси по всем, яже навел еси на ны, яко согрешихом и беззаконновахом отступивше от Тебе, и прегрешихом во всех, и заповедей Твоих не послушахом, ниже соблюдохом, ниже сотворихом, якоже заповедал еси нам, да благо нам будет, и предал еси нас в руки врагов беззаконных, мерзких - отступников, человеком неправедным и лукавнейшим паче всея земли.
И ныне несть нам отверсти уст, спуд и поношение быхом рабом Твоим и чтущим Тя. Не предаждь же нас до конца имени Твоего ради и не разори завета Твоего, и не остави милости Твоея от нас, яко, Владыко, умалихомся паче всех язык и есмы смирени по всей земли днесь, грех ради наших и несть во время сие начальника, пророка и вождя. И ныне возследуем всем сердцем и боимся Тебе и ищем лица Твоего, не посрами нас, но сотвори с нами по кротости Твоей, и по множеству милости Твоея, и молитв ради Пречистыя Матери Твоея и всех святых Твоих, изми нас по чудесем Твоим, и даждь славу имени Твоему, Господи, и да посрамятся вси являющии рабом Твоим злая, и да постыдятся от всякия силы и крепость их да сокрушится, и да разумеют вси, яко Ты еси Бог наш, един и славен по всей вселенной. Аминь.

MОЛИТBA
ЦAPЮ-MУЧЕНИКУ HИКOЛAЮ II

Госпoди Бoже Вседержителю! Склоняем выи и сердца наша и преклоняем колена наша перед Рабом Твоим, униженным, оклеветанным и умученным с безмолвного согласия отцов наших, Императором-великомучеником Николаем и иже с ним пострадавшими.
Каемся, яко некогда киевляне пред умученным ими князем Игорем, как владимирцы пред убиенным ими великим князем Андреем Боголюбским, и просим дерзновенно: за кровь святых Твоих даруй покаяние нам, свободи Отечествие наше от постигших бед и напастей, возроди землю Русскую, осени ю славою Своею и даруй ей Царя Православного, да сбудутся пророчества святых Твоих и да воспоет народ русский славу Отцу и Сыну и Святому Духу ныне и присно и во веки веков. Аминь.

МОЛИТВА
ЦАРСТВЕННЫМ МУЧЕНИКАМ, ДАННАЯ ЧУДЕСНЫМ ОБРАЗОМ

Помяни, Господи, Царя Давида и всю кротость его. Помяни, Господи, Царя Соломона и всю премудрость его. Помяни, Господи, убиенную Царскую Семью и молитвами их святыми помилую нас, грешных.

МОЛИТВА
СВЯТЫМ НОВОМУЧЕНИКОМ И ИСПОВЕДНИКОМ РОССИЙСКИМ

Святии новомученицы и исповедницы церкве российския, услышите усердную мольбу нашу! Вемы яко нецыи от вас, еще отроцы суще, послушающе о древлих страстотерпцех, в сердце своем помыслиша, колико прелюбезно и доброхвально есть таковым подражати, ихже ни муки, ни смерть не разлучиша от любве Божия. Благо же Вам, яко последовали есте вере и терпению тех, о нихже слышасте и ихже возлюбисте. А понеже на всякое время возможно есть наити на ны испытанием нечаянным, испросите от Господа нам мужества дар, иже толико благопотребен есть в житии человечестем. Вся концы отечества нашего страданьми своими освятившии, яко общии за вся ны молитвенницы, умолите Бога, избавити люди Своя от ига, ужаснешаго паче всякаго иного. И да отпустится нам и всему роду нашему грех, на народе российском тяготеющий: убиение царя, помазанника Божия, святителей же и пастырей с паствою, и страдания исповедников, и осквернение святынь наших. Да упразднятся расколы в церкве нашей, да будут вси едино и да изведет Господь на жатву делатели Своя, снесть да не оскудевает церковь пастырьми добрыми, иже имут просвещати светом истинныя веры столь великое множество людей, вере ненаученных или от веры отвратившихся. Недостойни есмы милости Божия, обаче страданий ради ваших Христос Бог наш да ущедрит и помилует всех нас, в помощь вас призывающих. Мы же Ему, Спасителю нашему со Отцем и со Святым Духом сокрушение о гресех и благодарение за вся всегда да приносим, славяще Его во веки веков. Аминь.

МОЛИТВА
ЦАРЮ-МУЧЕНИКУ НИКОЛАЮ ВТОРОМУ

О святой великий Царю-Мучениче Николае, державный хранителю и заступниче жизни нашея, ты вся, яже суть рабов твоих, веси, твоих же царских трудов и борений тайных никтоже весть, ниже ведети может, токмо помазавший тя Святый Дух, не презри грешных и недостойных рабов твоих молитвы и воздаяния скудная, от недостоинства нашего тебе возносимая, но испроси у Царя царствующих и Господа сил, Емуже нынепредстоиши с Царицею и чады, и слуги твоими, мужества, мудрости, терпения и страха Божия, яже стяжал еси в земной жизни твоей, и ихже в сие лукавое время нужднейше несть, возложи святую десницу твою на главы наша, коснися огненным мечем твоим, имже доныне Русскую Землю от врагов обороняеши, плещу нашею и вчини нас в число другов и оружеборцев твоих, да светлостию святыни твоея просвещаеми сподобимся приняти преемника Царского Престола твоего и в державней воли его поживем и к Царствию небесному путь наш исправим и на Страшнем Судищи Христове добр ответ дадим с тобою и со всем Царственным Родом твоим о всех, яже нам заповедана быша и тако упокоимся со Христом в Бозе, яко благословен еси во веки веков. Аминь.

МОЛИТВА
ВЕЛИКОМУЧЕНИКУ БЛАГОВЕРНОМУ ЦАРЕВИЧУ АЛЕКСИЮ

О страстотерпче святый царевиче Алексие! О новый Димитрие царевиче, якоже и сей, Дом свой заключающий! О Гавриилу Белостокскому и прочим младенцем, жидов обличителем, подобящийся! О Артемию отроку, народом пренебрегаему, последующий! Известны мы, яко ополченное войско, мятежными окруженное, тобою из топи непроходимыя невозбранно изведено бысть. Сии же изводимии, священнику, дерзновением фесвитянину Илии подобному, запинаху молити тя о спасении, не сущу ти людьми прославленну. Се ныне зриши царство твое, о нем же глаголал еси: Егда аз буду царь, не будет лжи окрест мене — днесь царство отца лжи является, за еже доселе не царствуеши ты в сердцах народа твоего. Сам убо, о царевиче, прииди и стани зде с нами, уцеломудри нас, аще и не водящих: ты еси врач изрядный, ведящий более нас потребная ко спасению нашему. Вемы сострадание твое, вемы кротость твою, вемы любы твою к народу твоему: помози в долгонедужии сущим людем твоим, не попусти любвеоставленней быти прежде Святей Руси, но сам яко веси, приими дерзновение во спасение наше. Аминь.

МОЛИТВА
ВЕЛИКОМУЧЕНИЦЕ БЛАГОВЕРНОЙ ЦАРИЦЕ АЛЕКСАНДРЕ НОВОЙ

О святая мученице царице Александро, о возлюбившая Господа от всего сердца твоего, и от всея души твоея, и всею крепостию твоею и всем помышлением твоим! Вемы, яко младенца тя сущу страданием венча Христос матери ти умершей: помолися о чадех наших, матерей лишенных, матерьми оставленных, матерьми убиенных. Вемы, яко Жениха ради Небеснаго готова была еси отвергнути жениха царственнаго: помолися об отроковицах и отроцех наших, да не изберут скотскую пищу, ценою души купованную. Вемы, яко возненавидена была еси ближними от венца брачнаго: помолися о юных женах, в домы мужей входящих. Вемы, яко неугодны были суть чада твоя, дондеже наследник не родися: помолися о женах, в долгонедужии сущих. Вемы, яко чадо молитвы, чадо веры твоея, сын и наследник, неисцельно болен явился есть: помолися не быти оставленным и болящим младенцем страны твоея, О избранная крестоносице Христова чрез все житие твое, возлюбившая народ твой паче себе: возжелевшая паче умрети, неже оставити страну твою: разделившая мученический венец с помазанником Божиим: умоли Бога твоего, да не отступим от Него в час посещения нашего, да верны пребудем Христу кийждо на месте своем, да внидем в Царство, идеже ты солнечная луча еси Солнца Правды, Христа Бога нашего, в Троице Славимаго, Аминь.

Источник: http://vk.com/id5932908